What’s next?
Hindi mo talaga alam kung anong pwedeng mangyari pag nakatapos ka ng pag-aaral. Maaaring marami kang planong iniisip sa araw na makuha mo ang diploma mo. Lahat ng pwedeng maging trabaho naiisip mo na. Kung magkano ang sweldo, kung saan at kung sino ang mga makakatrabaho mo at marami pang iba. Minsan nga pati unang bibilhin mo sa unang sweldo mo naiisip mo na.
Yung iba, gusto muna magpahinga. Yun bang after 4 years ng pagsusunog-kilay eh tambay muna ng ilang buwan bago humanap ng trabaho. Yung iba naman, hindi pa nakakagraduate pero todo na sa pagpasa ng resume para siguradong may trabaho na. Para-paraan lang naman yan. Sariling diskarte. Iba-iba ang mga gusto ng bawat taong nagtapos na sa pag-aaral, Ako? Eto ang kwento ko.
Nung nag 4th year college ako, wala na kong inisip kundi ang makagraduate. Lahat gagawin ko at pupuntahan ko para lang walang maging aberya sa pagkuha ng diploma. Umiwas ako sa mga absent. Kaya nga lang, sa di inaasahang pagkakataon, nagkasakit ako na kailangan pang maospital. Wala akong magagawa kaya nag-absent ako. Pero hindi yun naging dahilan para hindi ko makuha ang diploma ko.
Ika-18 ng Marso 2013 ako nagsuot ng toga at humarap sa mga tao na katunayan na graduate na ko sa kursong nursing. Masayang masaya ako nung araw na iyon dahil hindi ko lubos maisip na natapos ko ang kursong hindi ko naman talaga ginusto. Sa isip ko nung mga panahong iyon, BAKASYON! Yun talaga ang pumasok sa isip ko. Gusto kong pumunta sa lugar na makakapag-enjoy ako ng husto. Laking pasasalamat ko dahil hindi ako nabigo.
Unang linggo ng Abril ay nakapunta ako sa Pangasinan at sa Baguio bago ako tuluyan magreview para sa board exam Plano ko rin naman kumuha ng exam para naman magkaroon ng halaga ang pag graduate ko ng nursing. Sayang naman kasi kung nurse graduate nga ako pero di naman ako registered. Ayun. Kaya bago ako sumabak sa dalawang buwang pag-aaral, nag enjoy muna ako sa beach ng Pangasinan at lamig ng Baguio. Binisita ko pa ang Our Lady of Manaoag para ipagdasal ang pagpasa ko sa board exam. Kaya pag-uwi ko dito sa Quezon City, naghanap na ako ng review center.
Mula bakasyon, isang araw lang ang naging pahinga ko bago magreview. April 9 pumasok na ko sa review center na napili ko. Kasabay ng pagrereview ang pag-aayos ng mga papeles na ipapasa sa PRC. Akala ko nga hindi ako makakapag board exam dahil sa mga naging problema habang inaayos ko ang transcript ko at ang iba pang kailangan ng PRC. Pero talagang mabait ang Diyos dahil nakapagfile ako ng papers at pwede na for board exam.
Tiniis ko ang mga araw na gusto kong maglakwatcha pero hindi pwede. Pero nagawa kong mag-absent sa review ng isang araw dahil naka-set na talaga yung date ng pagpunta ko sa Batangas kasama ng barkada ko. Pagkatapos nun, wala na. Tutok na sa pag-aaral.
Ilang araw, ilang linggo ang hinintay ko bago mag board exam. Iniisip ko na rin ang magiging buhay ko habang hinihintay ko yung resulta. Pumasok na sa isip ko mag-apply sa call center pansamantala. O kaya tumambay ng ilang buwan at hintayin na lang ang resulta at kung ano pa. Inisip ko rin na lakarin muna ang mga mahahalagang bagay tulad ng NBI clearance, student driver’s license, Phil Health at iba pa.
Kaya kinabukasan pagkatapos ng board exam, kahit di pa nakakabawi ng tulog ay pumila na ko para makakuha ng NBI clearance. Yun nga lang, may kapangalan ako kaya kailangan ko pang balikan ulit. Pagkatapos sa NBI, dumeretso ako sa Las Pinas para sa LTO. Buti na lang kasama ko papa ko para di na ko mahirapan pumila pa. Nilagnat pa ko nung mga oras na yun at buti na lang hindi na lumala.
Yung araw na ring iyon ay nakatanggap ang papa ko ng text mula sa kaibigan niya na naghahanap ng part time tutor. Dahil wala naman akong ginagawa habang naghihintay ng resulta, pinatos ko na! Pag-uwi ko sa bahay ay dali-dali kong inayos ang resume ko. Inemail ko agad at naghintay ng sagot.
Sadyang mabait si Lord. Kinabukasan nun ay nagtext sa akin ang may-ari ng school at gusto na niya ko ma-interview. Kaya kahapon, pumunta ako sa bahay nila para sa personal interview. Mukha namang mabait yung magiging boss ko at inorient na niya ko sa magiging trabaho ko.
Oo, malayo sa course ko ang magiging trabaho ko. Pero okay lang! Basta may trabaho pwede na. Gusto ko lang magkaron ng sarili kong pera para hindi na ko masyadong pabigat. HAHAHAHA!
My life after graduation is to be a math teacher. Wala sa plano pero kusang dumating sa akin. Sabi nga nila, pag may opportunity na binigay si Lord, kunin mo na. Kasi hindi mo alam kung may dadating pa. 1 year contract is fine with me. Mabilis lang ang panahon. Makakaipon naman ako siguro kahit papano.
Kaya para sa mga tao na hindi pa rin sigurado kung anong magiging buhay after graduation, wag magsawang magdasal. Ibibigay ni Lord kung anong tama para sa’yo.
-Ngiti Tayo Kaibigan
